REFU é unha rede interinstitucional creada para promover o intercambio académico e a produción científica sobre os procesos morfoxenéticos da cidade, os métodos de análises e os seus impactos sociais, ambientais e económicos. Para iso, impulsa a mobilidade de estudantes e profesorado, organiza un seminario itinerante para o intercambio e debate de avances de investigación, difunde os seus resultados mediante publicacións científicas e fomenta o desenvolvemento de proxectos de investigación conxuntos que fortalezan a colaboración entre institucións.
Os días 13 e 14 de maio de 2021 celebrouse o XII Seminario da Rede de Estudos da Forma Urbana (REFU), titulado A interdisciplina no estudo da forma urbana, organizado pola área de Investigación Arquitectura e Urbanismo Internacional da Universidade Autónoma Metropolitana (UAM) de Ciudad de México. O encontro reuniu á comunidade académica para debater sobre a relevancia da cooperación entre disciplinas no estudo dos procesos morfolóxicos das cidades. Neste marco, os nosos compañeiros Manuel Bugallo e Cristina Villaverde presentaron o artigo científico «A paisaxe do Cabanelas. A pegada do conde en Laxedo», que posteriormente foi publicado nunha publicación colectiva que reúne as contribucións do seminario.
Desde o SuidoLAB estamos moi contentas por esta publicación que pon en valor non só un núcleo pertencente ao concello da Lama senón o traballo dos nosos compañeiros.
Forza Laxedo!
